查看: 116174|回复: 18

【原创】年年有鱼 点解唔少得鲮鱼

[复制链接]
发表于 2014-1-16 12:37:50 | 显示全部楼层 |阅读模式
本帖最后由 川鹤 于 2014-1-17 18:32 编辑

                                        【原创】年年有鱼 点解唔少得鲮鱼

                                                 川鹤  

    广东人钟意食鱼,除咗好味、有营养、冇乜脂肪,仲有好意头,年年有余,梗系好啦。食出好兆头,食出仙风侠骨,仲有诗情画意添。江河湖海,山塘水库,沙溪田垌,都养得鱼。笔者喺报纸发表文章提到年年有鱼象征年年有余,食在广州离唔开鱼,提到大头鱼(鳙鱼、崇鱼、松鱼),非洲鲫(越南鱼、罗非鱼、福寿鱼)、普通鲩同黑鲩,仲有胜过前边咁多种鱼类、价钱超过好多雪藏海鲜嘅新品种——仙骨大头鱼,简称仙骨鱼,宜家(现在)酒楼食肆时兴叫佢另一个名称“缩骨鱼”,仲兴辣味“火锅”(广东话叫做“打边炉”),仲有仙骨鱼同大头鱼杂交形成嘅新品种,类似野猪同家养猪杂交形成嘅新品种一样,味道都几好,食过返寻味。之不过,就算数尽全世界几多种鱼,摆齐价值连城嘅海鲜鱼翅响张台嗰度,新年流流始终都系觉得少一样嘢,皆因过年时节,喺广州传承咗不知几多代嘅传统风俗就有:台面要摆一盘鱼,最好就系两条鲮鱼,象征连年有余,福气双临,喜事连绵。点解用鲮鱼?除咗“天灵灵,地灵灵,天上神仙下凡程”之外,仲寄望后辈,聪明伶俐,醒定做人,有所作为。(待续)

回复

使用道具 举报

 楼主| 发表于 2014-1-16 14:11:19 | 显示全部楼层
平时,广州市场嘅鲮鱼价格系十几文斤(每斤十几元),过年时分就飙升至廿几皮(二十多块钱),及得上好味嘅雪藏海鲜喇。(待续)
回复 支持 反对

使用道具 举报

 楼主| 发表于 2014-1-16 20:28:27 | 显示全部楼层
鲮鱼,“鲮”嘅广州话发音有两种,书面语发音同“零”字一样,标音系ling4,好多乡音口语亦都系噉讲,不过广州话同珠三角周围嘅口语唔系噉讲,系讲成leng4,“靓”嘅第四声,同“凉”同声调,语言学叫做“文白异读”,即系读书音同口语发音唔同。“鲮”嘅同音字“灵”字亦系噉,文白异读。讲白话嘅人尤其系广州人特别睇重“灵变”(灵活应变能力),呢个亦系钟意用鲮鱼嚟寄托年年有余祝福愿望嘅传统因由。
回复 支持 反对

使用道具 举报

 楼主| 发表于 2014-1-16 20:54:11 | 显示全部楼层
http://weibo.com/3050950433/profile
已分享到我的微博,欢迎光临。
回复 支持 反对

使用道具 举报

 楼主| 发表于 2014-1-16 22:58:44 | 显示全部楼层
白话歌谣都有唱“有鱼有肉有菜蔬”,比喻生活无忧、温饱不愁,前边嗰句就系“今时好过旧时多”,喺白话里边系押韵嘅。鱼系摆喺第一位嘅,系生活够唔够丰富多彩、充实盈余嘅标准,冇鱼就唔使讲、唔使唱,就系咁直白嘅道理。所以,年初一除咗劏鸡熠鸭斩料之外,整返两条鲮鱼系唔少得嘅。
回复 支持 反对

使用道具 举报

 楼主| 发表于 2014-1-16 23:29:50 | 显示全部楼层
本帖最后由 川鹤 于 2014-1-17 18:20 编辑

嗰盘鲮鱼摆喺边度?年初一将鲮鱼煎熟(小心煎,煎成金黄色,保留鱼头、鱼身、鱼尾、鱼皮完整,不能脱皮,适合放得持久)之后,有两种摆法,一系摆喺食饭台,“有依食”;二系摆喺米缸里头,“鱼米之乡”嘅浓缩版。摆到年初二,“开年”时份,就可以食呢盘灵灵验验嘅年年有鱼喇。俗语都有话:红花都要绿叶嚟扶持。过年时节呢两条鲮鱼成咗中心,仲要“菜蔬”衬托,呢个时候嘅生蒜、生菜亦系好似鲮鱼咁好卖,而且生菜仲唔使切去菜头菜根,成条连泥带根一齐卖,生蒜本来就系连根卖,过年嗰阵就系噉样摆喺厨房或者餐厅,有生机活力同财气、识得精打细算。
回复 支持 反对

使用道具 举报

 楼主| 发表于 2014-1-17 00:03:27 | 显示全部楼层
本帖最后由 川鹤 于 2014-1-17 01:05 编辑

旧阵时我地忆苦思甜,讲到新社会嘅幸福,就会念“芝麻开花节节高,倒吃甘蔗节节甜”。呢句系北方俗语,我地广府嘅习俗系年初一之前将三条以上嘅甘蔗成条搬返屋企,呢种甘蔗系“青必必”嘅(青蔗),唔可以“黑掹掹”(唔系黑蔗),要有蔗叶、蔗根(根须)仲带有泥沙,年初一摆喺屋企厅堂墙边,象征生活甘甜,节节高升,越来越好。食蔗可以调转头嚟食,摆放甘蔗系顺其自然,蔗根贴地,蔗叶向上,好似珠江三角洲嘅“蔗基鱼塘”嗰啲甘蔗。
回复 支持 反对

使用道具 举报

 楼主| 发表于 2014-1-17 00:51:56 | 显示全部楼层
蔗基鱼塘里头,经常见到嘅鱼,梗有鲮鱼,从古到今都系畅销嘅鱼类。鲮鱼肉质鲜美,鲮鱼丸档口喺市场系效益唔错嘅,豆豉鲮鱼罐头更加系旧时广东罐头厂、顺德罐头厂嘅王牌产品。淡水养殖海鲜兴起之时,鱼塘养殖嘅桂花鲈(鳜鱼)同鲈鱼嘅最大区别除咗系花斑尾之外,就系净系食识游水嘅鱼仔虾毛,特别钟意食鲮鱼鱼苗(广州话叫做鱼毛mou1)。养殖桂花鱼嘅专业户,都有养殖鲮鱼嘅鱼塘,鲮鱼养大咗除咗卖去市场,仲有同罐头厂订合同,仲有卖去经营养龟或者养大型嘅鱼类之类档口嘅地方。鲮鱼嘅功效系活血、温补、美容,系一种有益嘅食物。外形亦潇湘好睇,所以广州人用嚟做连年有余嘅盘中首选。好多人将鲢鱼同鲮鱼混同,系错嘅。鲢鱼嘅外形同大头鱼差唔多,区别就系头细,大头鱼嘅其他名称就有大头鲢鱼等等。广府习惯系过年摆鲮鱼,唔系鲢鱼。
回复 支持 反对

使用道具 举报

 楼主| 发表于 2014-1-17 11:55:03 | 显示全部楼层
年关将近之时,“年年有鱼”嘅话题好热,乜嘢讲法都有,鲤鱼代表得利,桂花鱼代表富贵,鲢鱼代表连年有余,鲮鱼并唔显眼,净系轻描淡写话系灵巧,殊不知广州话嘅“灵巧”之“灵”得一种发音,ling4,同“鲮鱼”嘅口语发音leng4唔“戥称”,亦唔符合使用鲮鱼嘅主要意思,唔单止系灵巧咁简单,系灵验之“灵”,仲有对下一代同未来期望嘅寄托,系广府文化嘅传统习俗。广府仲有一句谚语:宁生败家仔,勿生蠢钝儿。最忌讳嘅系蠢钝,人蠢冇药医。做嘢要反应快,要灵变,要争夺先机,有句俗语就系“执输行头惨过败家”。执输行头,即蠢钝,唔灵变,反应太慢,畀人地行头先,真系惨过自己败家。其他嘅嗰啲鲤鱼、桂鱼、鲢鱼系历史上从来未曾有过嘅习俗,广州嘅好多市场都见唔到鲤鱼、鲢鱼,因为唔系几啱本地人口味;桂鱼少见,因为价钱贵咗啲。北方就有用鲤鱼跳龙门嘅寓意嚟做年年有余嘅象征嘅。北方人就喜欢食煎炒、油炸鲤鱼,我喺北方食过。新年流流,广府人连“猪肝”呢铺话法都会忌讳,要讲成“猪润”(“润”变调为第2声,粤西就讲成“猪湿”),因为肝、干(干旱之“干”)同音,会唔会钟意有“怜”嘅同音嘅食物“鲢鱼”摆喺度呢?文学作品《红楼梦》有个人物柳湘莲,柳丝相怜之意也。同可怜个“怜”字同音,系有避忌嘅。细路哭闹唔停,大人嘅教导好多时候就系:收声,冇人可怜你嘅,生生性性,醒醒定定,听听话话。一讲就灵,即时止咳(广州话幽默用语,比喻小孩不哭闹了)。不过,鲢鱼真系有止咳、暖胃、美容嘅食疗功效,过完年之后即管试试。
回复 支持 反对

使用道具 举报

 楼主| 发表于 2014-1-18 15:26:53 | 显示全部楼层
来源于网络的鲮鱼图片
来源于中国钓鱼网网民介绍的新鲜钓到的鲮鱼.gif
回复 支持 反对

使用道具 举报

 楼主| 发表于 2014-1-18 16:30:57 | 显示全部楼层
本帖最后由 川鹤 于 2014-1-18 17:05 编辑

本人的简笔画:年年有余
简笔画:年年有鱼.jpg
回复 支持 反对

使用道具 举报

 楼主| 发表于 2014-1-18 23:26:06 | 显示全部楼层
本帖最后由 川鹤 于 2014-1-18 23:52 编辑

旧时珠江三角洲乡下新年时节搬甘蔗返屋企摆,系将蔗根嗰头放喺地面拖住一路行嘅,好开心,成咗习惯,喺广州如果有家庭继续保留呢种传统,都有人会拖住啲蔗返屋企,攞意头,长长久久,亦寄托长寿幸福、顺顺掂掂嘅祝愿。广州话有句俗语叫做“掂过碌蔗”,比喻事事顺利,比甘蔗直通通仲要直、仲要顺畅。
回复 支持 反对

使用道具 举报

 楼主| 发表于 2014-1-22 12:31:10 | 显示全部楼层
“碌”喺广州话里头,既可以做动词(相当于普通话的“打滚”),亦可以做形容词(相当于普通话的“圆滚滚”,例如“圆轱碌”、“圆碌碌”),仲可以做量词,指横截面系圆形嘅长条形状计件单位,例如一碌蔗、一碌棍。单独指一件之时,数词经常可以省略。
回复 支持 反对

使用道具 举报

 楼主| 发表于 2014-1-27 12:01:11 | 显示全部楼层
广府传统将甘蔗摆喺厅堂,靠墙摆好,要三条以上,多多益善,根叶茂盛,长长久久,甜甜蜜蜜,节节高升,年年好景。传统习惯,厅堂嘅年桔亦系好得人钟意嘅,花市未到就已经摆满街,今年嘅年桔细细棵都要三十文左右,大盆嘅要几百文,当然呢啲系年节前飙升嘅行情,过完年之后又唔同。仲有桃花,寄望时来运转,过个好年。更有好多品种嘅鲜花,插满花瓶。屋前屋后嘅花圃、绿色植物亦系广府民俗追求生态自然、生机活力嘅一种传统。
回复 支持 反对

使用道具 举报

发表于 2014-2-6 20:31:47 | 显示全部楼层


好文章
回复

使用道具 举报

您需要登录后才可以回帖 登录 | 快速注册

本版积分规则

快速回复 返回顶部 返回列表