查看: 37458|回复: 3

【原创】广州话词汇“后生仔女”

[复制链接]
发表于 2015-7-11 14:15:06 | 显示全部楼层 |阅读模式
本帖最后由 川鹤 于 2015-7-11 15:06 编辑

【原创】广州话词汇“后生仔女”

粤语属于汉语方言,有好多汉语语言嘅共性,但作为方言,肯定会有自身嘅特点、个性。除咗发音、词汇之外,语法方面亦有零卸唔同嘅一啲特色。譬如讲,仔、女呢两个字,喺粤语里面嘅意思系“儿子”、“女儿”,发音系dzai2、noey2 。传统讲法,有仔有女,福气齐全,呢个“好”字就系“子”“女”组成嘅。现代意识、新时代新概念,就系生男生女都系一样,仔又好,女又好,最紧要睇生活过得好唔好。仲有“生仔好听、生女好命”、“好仔不如好新抱(儿媳)”、“亲生仔不如近身钱”等等典型嘅粤式念白。讲到仔女,仲有重叠词语“仔仔女女”。仔女,幼年嘅时候叫“细露”,好似细小嘅露水,要细心“呵护”。呵护,系普通话词汇,书面语。广州话点样讲呢?一时真系好难谂得出,平时讲话就有“呵呵”、“惜惜(sek8)”,表示好“疼惜”,到青年时期,或者相对年轻嘅时候,譬如讲三四十岁嘅同五六十岁以上嘅人来比较,可以讲系“后生”。
之不过,三四十岁嘅中年人,同十几廿几岁嘅青少年就冇得比。青少年可以称得上“后生仔”、“后生女”,仲有一个缩略称谓“后生仔女”。年过三十,三十而立,四十而不惑,就点样都算唔上“后生仔女”。呢个“仔女”,意思既包含有为人儿女之仔女,亦强调后生(年轻)、晚辈、成长阶段、仲未成熟,等等。同普通话嘅“青年男女”对比睇睇,“后生仔女”含义丰富得多,一系有后生可畏嘅寓意,青春时光值得珍惜;二系强调晚辈定位、成长阶段,提醒后生人要有准确定位,早啲成熟;三系强调有“为人子女”嘅责任,“后生仔女”唔单止系后生仔、后生女嘅合并组词,系从社会概念嚟睇,每一个人,都有父母,都系仔女呢一个辈份,眼前或将来都会有仔女,为人做事要对家庭负责,要对社会负责。
回复

使用道具 举报

 楼主| 发表于 2015-7-11 16:00:46 | 显示全部楼层
本帖最后由 川鹤 于 2015-7-11 16:11 编辑

呢个词汇嘅产生,亦唔系偶然嘅,系长期嘅文化环境熏染出嚟嘅。粤语词汇里头,强调家庭嘅有好多:为长(dzoeng2)为大(相当于普通话嘅“长兄如父”)、老窦养仔仔养仔,等等。传统嘅观念同词汇、俗语里头,唔见有“老母养女女养女”噉嘅讲法,呵呵,亦冇“长女如母”,冇乜特别情况亦唔会有边个跟随母亲嘅姓。旧时书房仔读书,系见唔到有女仔嘅,有钱人嘅深闺小姐,先至会请先生喺屋企教。旧时嘅女性,好多都系有姓冇名,姓氏加个氏字,城市嘅就系老公姓氏加上自己嘅姓氏再加个氏字。以前睇欧阳山嘅小说《三家巷》,有人物“周杨氏”,广州市区街巷嘅普通妇女。旧时冇机会读书嘅妇女,特别系农村妇女,唔识字,非常多啊。今时今日,有老年妇女喺乡下嚟到城市,住喺仔孙嘅屋企好幸福,但认屋企、上落电梯就好头疼,同孙仔孙女一齐认1、2、3、4、5呢啲数字,学识咗,揿电梯上落,认门牌。细露从1学起,老人讲实际,1字咁浅,一学就识,然后就从自己住嘅嗰层楼嘅数字学起,就记住嗰个数字先,揿实嗰个先。门牌数字亦系紧要,学识先!呵呵。呢啲叫做抓住主要矛盾。讲到计数、心算,唔使写出都唔知几精明,好多做生意嘅都唔识字嘅,包括老板娘,传统嘅生意经一套套,算得乜嘢。买菜更加之唔成问题。所以话,讲到“后生仔女”,就唔系摆老资格,话老嘅就比后生嘅叻,只系话后生仔女嘅条件比老一辈好咗好多,读书机会多,生活环境亦好咗好多,成长机会当然亦多咗好多,但要成熟起来就比老一辈难好多啊。旧时系“穷人的孩子早当家”,好多人系想读书都冇机会,宜家虽然亦有发愤图强嘅,但亦有好多系有书都唔想读,有工唔想做,一味“啃老”嘅。“啃老”亦系普通话词汇,广州话点样讲,一时又谂唔出,讲“菠萝鸡靠黐”嘛,系黐人哋,黐父母唔算。点讲好呢?最有特点嘅广州话就系“后生仔女”,要争气!
回复 支持 反对

使用道具 举报

 楼主| 发表于 2015-7-11 17:00:33 | 显示全部楼层
睇返历史,清末民初以后,中国出现新式学堂,有女仔入学,小学就系男女同班都冇问题,乡下都系噉。到中学阶段,民国初期都系男女授受不亲,有女子中学、女子师范、女子职业中学等等,当然,后来嘅中学都有男生女生同一间学校。西方教堂办嘅大学喺清末民初就有男女学生一齐招录嘅情况。旧时嘅新青年,喺争取男女平等、营造成才环境嘅时候,实际上仲有好多问题,唔单止女仔冇书读,好多男嘅一样系冇书读,旧时代文盲率非常高,经过好多次扫盲,基本文盲数字大幅度减少,宜家系提高义务教育嘅普及率,而且唔系解决男女同校嘅问题,系防止早恋、校园暴力、网吧游戏、社会复杂环境等等都“应接不暇”。所以又可以话,“后生仔女”呢个词汇,又体现咗上一辈对下一辈嘅教育、期望、监护责任。如果冇尽到责任,影响到一生,身为长辈就讲唔过去。望子成龙、望女成凤系好多代中国人嘅梦想,但要靠自己努力,亦要有长辈嘅表率同一定嘅环境。无论长辈定系晚辈,揸住教鞭嘅先生定系藏龙卧虎嘅后生仔女,都一样要明确定位同责任,远离浮躁同污染,有所作为,先至可以立足社会。
回复 支持 反对

使用道具 举报

 楼主| 发表于 2015-7-11 17:07:54 | 显示全部楼层
更正:开头讲到“语法方面亦有零卸唔同嘅一啲特色”,睇过之后,语法方面冇乜唔同,呵呵。应该系喺词义、生活哲理方面更加丰富。
回复 支持 反对

使用道具 举报

您需要登录后才可以回帖 登录 | 快速注册

本版积分规则

快速回复 返回顶部 返回列表